નામ ક્યાં છે આપણાં સંબંધનું કઈ તો ય આ નાતો ગમે છે

નામ ક્યાં છે આપણાં સંબંધનું કઈ તો ય આ નાતો ગમે છે
નામ આવ્યું તારું વાતોમાં પછી તારી બધી વાતો ગમે છે

ને નિભાવી છે દુશ્મની રાત સાથે તો વર્ષોથી જાગતાં મેં
પણ હવે તારા સમો આ ચાંદ સાથેની મુલાકાતો ગમે છે

ખીડકી કેવી તમારા ઘર ની જ્યાં મારો સમય વીતે મજાનો
શોખ ઉભવાનો છે નીચે ને સુગંધી વાયરા કાં તો ગમે છે

ને પડે છે કાનમાં છમછમ સંગીતી સાજ તારી ઝાંઝરીનો
ત્યાં અવસ્થા ધ્યાનમય થઈ જાય બસ મારા આ જઝબાતો ગમે છે

ક્યાં લખાતી તી ગઝલ પેલાં અને અમથાં વિચારો આવતા ક્યાં
જાગું હું, કાગળ અંગડાઈ લે કલમ વળ ખાય એ રાતો ગમે છે

- ઉદયન ગોહિલ

ભૂત ભુવા ડાકલાં દાણા છે સઘળું અગડમ બગડમ

ભૂત ભુવા ડાકલાં દાણા છે સઘળું અગડમ બગડમ
ક્યાં ભગાવે ક્યાં થી ટાળે જાદુ કાળું અગડમ બગડમ

હાથેથી ખેરે કંકુ ને માથું ઘૂમે ચારેય બાજું
ખોટું ધૂણે ને ધુણાવે આવું હાળું અગડમ બગડમ

કામ ક્યાંથી થાય તારું કે શ્રદ્ધા નામે છે મીંડુ
આવું અમથું કહી ફેલાવે મોટું જાળું અગડમ બગડમ

ને બતાવે એવું જાણે ચોટલી એનાં હાથોમાં
ના કુચી લાગે રે ત્યાં ભૂતિયું તાળું અગડમ બગડમ

ને રચે તરકટ એ છેલ્લે પાછું માતાજીનાં નામે
આંખે પાટા ખોલું તો તરકીબ ભાળું અગડમ બગડમ

- ઉદયન ગોહિલ

જાવ ને માંગો ફરીથી પ્રભુ પાસે કંઇક નવું

જાવ ને માંગો ફરીથી પ્રભુ પાસે કંઇક નવું
ડૂબી જાવું પ્રાર્થનામાં એ તમારું ગજું નથી

ખેંચ પૂરી તું પ્રત્યંચા ને ચઢાવી લે તીર ને
માફ કરવું હાથ જોડી ને તમારું ગજું નથી

આ નદી આકાશ તારાં ચાંદ સઘળું છે તારું પણ
એ મફતમાં મળવું સૌ ને તમારું ગજું નથી

છે બળાપા રોજનાં જે વ્યથિત કરતાં હશે કદી
ને લકીરો વાળવી ક્યાંયે તમારું ગજું નથી

દીકરી મા બેન પત્નીથી અલાયદો વિચાર કર
સ્ત્રી ને સ્ત્રી ગણવી જરૂરી જે તમારું ગજું નથી

- ઉદયન ગોહિલ

જુએ છે એ હવે આંખો જરા નીચી કરી ને

જુએ છે એ હવે આંખો જરા નીચી કરી ને
જવાની ની પહેલી આ નિશાની હું કહું છું

ખરે પાંદડું સુકાયેલું જો લજ્જત થી સાંજે
હસ્તરેખા ની આગળ જિંદગાની હું કહું છું

ને કર્યા યાદ સાથોસાથ તમને ને ખુદા ને
ફકીરી પ્રેમની પૂર્ણ કહાની હું કહું છું

ને કરશે કામ ઊંમર એનું આખીરી સમયમાં
આ ઢળતી સાંજની રાતો સુહાની હું કહું છું

કક્કો પાનું અક્ષરો વારતા સઘળું તમારું
હા, આ કિરદાર માં વાતો મઝાની હું કહું છું

- ઉદયન ગોહિલ

કરી દીધી હવાલે જિંદગી તારે

કરી દીધી હવાલે જિંદગી તારે
જવું છે ક્યાં સિવા તારા હવે મારે

કે આથમશે સંધ્યા તો આવશે રાત્રી
અંધકાર પણ છે તો પ્રકાશ સથવારે

મળે કે ના મળે શું ફેર પડવાનો
છે ખુદા જો સમંદર તો હું પતવારે

કે આ માળા ને મણકા ને મંત્રો સઘળાં
નકામા જ્યાં સુધી અંતર ન પુકારે

છે આ મિજાજ, મારો વેશ બીજું શું
કર્યો છે દીપ તો છું મારી મઝારે

- ઉદયન ગોહિલ

લખું જ્યાં ગઝલ, યાદ આવે સખી

લખું જ્યાં ગઝલ, યાદ આવે સખી
અકારણ મને કાં સતાવે સખી

છે ખોટાં બધાં વાયદા એનાં કે
મુલાકાત અમથી લંબાવે સખી

કૃષ્ણ-દ્રૌપદી જેવો નાતો છે આ
ગ્રંથ મિત્રતાનો મઢાવે સખી

કહું જિંદગી સૂકું રણ તો એમાં
બની વાદળી હેત લાવે સખી

કરો એકઠાં વેદ ચારેય તો
રખે વેંત ચઢતી બતાવે સખી

- ઉદયન ગોહિલ

રંગો હું લઇ આવીશ ને રંગોળી તું કરજે સખી

રંગો હું લઇ આવીશ ને રંગોળી તું કરજે સખી
રંગબેરંગી રંગો થકી ચાહત મને ધરજે સખી

આવું છું મેલી પડતું આખુંયે જગત તારા સુધી
આંખે ઈશારો મલકતો રાખી મને મળજે સખી

કંગન બિંદી ને રેશમી સાડી ને ઊંચા અંબોડે
આવું હું જ્યારે મળવા તો આવી મસ્ત સજજે સખી

ને હા કરાવે કોઈ મોઢું મીઠું એ પૂરતું નથી
તો આંગળીથી તું જ મારા હોંઠ ને અડજે સખી

ને ચા ગરમ તો એની લજજત આખી જુદી હોય છે
એ ચાહતે જન્મોજન્મ ગમતી મને બનજે સખી

- ઉદયન ગોહિલ