આવે નજરમાં એમ ક્યાંય એ મને મળતી નથી
અમથી હવા બાબતની મારી ગણતરી ફળતી નથી
બાંધેલું છે આકાશ આ મેલી નજરથી કોઈકે
તારા ખરી ગ્યાં સેંકડો ને આસ આ બળતી નથી
છે ધ્યાનમાં હળવેથી તે ઊઠાવી તી આંખો તે દિ
ગઈ વાત ક્યાં કે એ નજર ક્યારેય હવે છળતી નથી
ને છે ફરક બસ આટલો આ દિલ્લગી ને પ્રેમમાં
છો હોય ના સાથે એ પણ એની કમી કળતી નથી
છે લાજમી તમને તમારો વટ તમારાં સોળ મેં
તલવાર ને રાખો મ્યાનમાં કે બાર એ વળતી નથી
ફૂટે નવા દાંતો એ શતક પારની નિશાની છે
કે આ ગઝલની છે જવાની જે કદી ઢળતી નથી
- ઉદયન ગોહિલ
લે છે વળાંક હાથની રેખા પચાસે તો પછી મળવાને તું આવીશ ને !
થોડી સફેદી સાથ ઉડતા વાળની સાથે ફરી ઉડવાને તું આવીશ ને !
વેઠ્યો છે તડકો જિંદગીમાં ખૂબ તે પણ ને મેં પણ એ તો ખબર છે બંને ને ,
ઢળતી આ સાંજે જામ ની હો આખરી બુંદો ને ત્યાં ગળવાને તું આવીશ ને !
કિસ્સા ઘણાં છે બેવફાઈના આપણી આંખો સમક્ષ ને હજુ પણ આવશે ,
પણ કોઈ મીઠાં દર્દ જેવું પાછલી ઉંમરે મને કળવાને તું આવીશ ને !
જોયું હશે આખું જગત એવું શક્ય છે ને એ તારો શોખ પણ છે, જાણું છું ,
સ્કુટર, ચા ની ટપલી ને મારો સાથ જો હોય તો ફરવાને તું આવીશ ને !
ને આમ લૂંટાતો રહ્યો વારે તહેવારે હું કઈ કેટલીય વખત તારા નામે ,
તો આખરી બાજી માં પગલાં જો પડે પાછાં તો ત્યાં છળવાને તું આવીશ ને !
- ઉદયન ગોહિલ
મને પણ છે ઇન્તેઝાર તો અર્થ એવો નથી એ આવશે દોડી ને મળવા
હતો એ શોખ મારો તો મેં મૂકી દોટ ઝાંઝવા સુધી જળ ને પકડવા
છે સૂકી આ ધરા સાથે નજરમાં કેદ દ્રશ્યોનો અહેસાસ પણ નિરર્થક
સફરનો થાક ઉતરે જિંદગીમાં જો કદી આંખો તને ભાળે સજનવા
મંદિરો મસ્જિદોમાં કેટલાં ફેરા કરી થાક્યો પછી સમજાયું સઘળું
રહેતા છે એ કણકણમાં તો એને ચાર દીવાલો વચ્ચે ક્યાંથી સમજવા
ને આ જે ધોમધખતો તાપ ગરમીથી વરાળબુંદો જે આકાશે ચઢે છે
એ તો બસ નીકળી પડ્યો છે સાગર કઈ અમસ્તો આ પવન સંગાથે ફરવા
બંને સરખાં ભરેલો જામ ને તું આમ જોવા જઈએ તો પહેલી નજરમાં
ચઢે થોડો નશો જાઝો મળે સાંજે સુંવાળો હાથ તારો જો જકડવા
- ઉદયન ગોહિલ
જોઈ ને ફેરવી લો આંખો તો ,
માનું ! જોવા રજા તમારી છે ?
ખેલવો ખેલ તો બરાબરનો ,
આ શું ખાલી મજા તમારી છે .
ના ટકે ક્યાંય આ નજર મારી ,
છે જુદી પણ સજા તમારી છે .
હાથ મારો, લજામણી છે તું ,
એ અર્પેલી કઝા તમારી છે .
ને ફરકતી રહી સદા દિલે
એ સનમ સી ધજા તમારી છે .
- ઉદયન ગોહિલ
નામ ક્યાં છે આપણાં સંબંધનું કઈ તો ય આ નાતો ગમે છે
નામ આવ્યું તારું વાતોમાં પછી તારી બધી વાતો ગમે છે
ને નિભાવી છે દુશ્મની રાત સાથે તો વર્ષોથી જાગતાં મેં
પણ હવે તારા સમો આ ચાંદ સાથેની મુલાકાતો ગમે છે
ખીડકી કેવી તમારા ઘર ની જ્યાં મારો સમય વીતે મજાનો
શોખ ઉભવાનો છે નીચે ને સુગંધી વાયરા કાં તો ગમે છે
ને પડે છે કાનમાં છમછમ સંગીતી સાજ તારી ઝાંઝરીનો
ત્યાં અવસ્થા ધ્યાનમય થઈ જાય બસ મારા આ જઝબાતો ગમે છે
ક્યાં લખાતી તી ગઝલ પેલાં અને અમથાં વિચારો આવતા ક્યાં
જાગું હું, કાગળ અંગડાઈ લે કલમ વળ ખાય એ રાતો ગમે છે
- ઉદયન ગોહિલ
ભૂત ભુવા ડાકલાં દાણા છે સઘળું અગડમ બગડમ
ક્યાં ભગાવે ક્યાં થી ટાળે જાદુ કાળું અગડમ બગડમ
હાથેથી ખેરે કંકુ ને માથું ઘૂમે ચારેય બાજું
ખોટું ધૂણે ને ધુણાવે આવું હાળું અગડમ બગડમ
કામ ક્યાંથી થાય તારું કે શ્રદ્ધા નામે છે મીંડુ
આવું અમથું કહી ફેલાવે મોટું જાળું અગડમ બગડમ
ને બતાવે એવું જાણે ચોટલી એનાં હાથોમાં
ના કુચી લાગે રે ત્યાં ભૂતિયું તાળું અગડમ બગડમ
ને રચે તરકટ એ છેલ્લે પાછું માતાજીનાં નામે
આંખે પાટા ખોલું તો તરકીબ ભાળું અગડમ બગડમ
- ઉદયન ગોહિલ
જાવ ને માંગો ફરીથી પ્રભુ પાસે કંઇક નવું
ડૂબી જાવું પ્રાર્થનામાં એ તમારું ગજું નથી
ખેંચ પૂરી તું પ્રત્યંચા ને ચઢાવી લે તીર ને
માફ કરવું હાથ જોડી ને તમારું ગજું નથી
આ નદી આકાશ તારાં ચાંદ સઘળું છે તારું પણ
એ મફતમાં મળવું સૌ ને તમારું ગજું નથી
છે બળાપા રોજનાં જે વ્યથિત કરતાં હશે કદી
ને લકીરો વાળવી ક્યાંયે તમારું ગજું નથી
દીકરી મા બેન પત્નીથી અલાયદો વિચાર કર
સ્ત્રી ને સ્ત્રી ગણવી જરૂરી જે તમારું ગજું નથી
- ઉદયન ગોહિલ
