લે છે વળાંક હાથની રેખા પચાસે તો પછી મળવાને તું આવીશ ને !
થોડી સફેદી સાથ ઉડતા વાળની સાથે ફરી ઉડવાને તું આવીશ ને !
વેઠ્યો છે તડકો જિંદગીમાં ખૂબ તે પણ ને મેં પણ એ તો ખબર છે બંને ને ,
ઢળતી આ સાંજે જામ ની હો આખરી બુંદો ને ત્યાં ગળવાને તું આવીશ ને !
કિસ્સા ઘણાં છે બેવફાઈના આપણી આંખો સમક્ષ ને હજુ પણ આવશે ,
પણ કોઈ મીઠાં દર્દ જેવું પાછલી ઉંમરે મને કળવાને તું આવીશ ને !
જોયું હશે આખું જગત એવું શક્ય છે ને એ તારો શોખ પણ છે, જાણું છું ,
સ્કુટર, ચા ની ટપલી ને મારો સાથ જો હોય તો ફરવાને તું આવીશ ને !
ને આમ લૂંટાતો રહ્યો વારે તહેવારે હું કઈ કેટલીય વખત તારા નામે ,
તો આખરી બાજી માં પગલાં જો પડે પાછાં તો ત્યાં છળવાને તું આવીશ ને !
- ઉદયન ગોહિલ
No comments:
Post a Comment